Xaricə səfər etmək üçün bu sənədlər tələb olunur

Rusiya vətəndaşları iş, təhsil, müalicə və ya qohumlarına baş çəkmək üçün xaricə gedə biləcəklər.

“Newpost.az” Rusiya mətbuatına istinadən xəbər verir ki, bunun üçün vətəndaşlar tərəfindən səfərin məqsədini təsdiqləyən aşağıdakı sənədlərin təqdim olunması mütləqdir:

• müalicə məqsədi ilə gedərkən müvafiq tibb təşkilatı tərəfindən müalicə müddətini göstərən və ya Rusiya Səhiyyə Nazirliyi tərəfindən verilmiş sənəd;

• xəstə qohumlarına qayğı göstərmək üçün – xəstələrin vəziyyətini təsdiq edən müvafiq tibb təşkilatının məlumatları, həmçinin qohumluq əlaqələrinin dərəcəsini təsdiq edən sənədin surəti;

• işləmək məqsədi ilə – əmək fəaliyyətinin əsaslılığını təsdiqləyən məlumatlar tələb olunur (məsələn, xarici işəgötürənlə bağlanmış müvafiq əmək müqaviləsi və ya qəbul edən tərəfin səlahiyyətli təşkilatı tərəfindən verilmiş iş icazəsi);

• təhsil almaq məqsədi ilə – müvafiq xarici təhsil müəssisəsində təhsil aldığını təsdiqləyən sənədlər (və ya Rusiya universitetindən xaricdə təhsil almağa göndərilməyə dair sənəd);

• Qeyd olunanlarla yanaşı işə və ya təhsil almağa gedərkən xarici dövlətin icazə sənədi.

Lakin qeyd etmək lazımdır ki, ölkənin Nəqliyyat Nazirliyi beynəlxalq uçuşların bərpa olunmasına dair konkret bir tarix açıqlamamışdır. Xatırladaq ki, cari ilin mart ayının 27-dən etibarən koronavirus pandemiyası ilə əlaqədar olaraq Rusiya beynəlxalq sərnişin daşımalarını dayandırıb. Yalnız xaricdə olan rus vətəndaşlarının ölkəyə geri dönməsi üçün çarter reysləri həyata keçirilir. Bununla yanaşı martın 30-dan etibarən Rusiya sərhədlərini tamamilə bağladı, istisnalar yalnız müəyyən kateqoriyalara, məsələn, diplomatik işçilərə şamil olunur.