Rusiyada öldürülən 19 yaşlı Vəkil Abdullayevin atası: “Polis oğluma məqsədyönlü şəkildə öldürücü atəş açıb”

“Oğlumu qətlə yetirən polisin Rusiya qanunlarının tələblərinə uyğun şəkildə cəzalandırılacağına, haqq-ədalətin bərpa ediləcəyinə inanıram”.

Bunu Rusiyanın Novosibirsk vilayətində polisin qətlə yetirdiyi 19 yaşlı Vəkil Abdullayevin atası Yaqub Abdullayev deyib.

• “Azərxalça”nın sabiq rəhbəri Vidadi Muradovun həbs müddəti uzadılıb

• Sumqayıtda baş verən yol qəzasında sürücü xəsarət alıb – FOTO – VİDEO – YENİLƏNİB

• DYP ictimai nəqliyyatda və avtomobillərdə maskadan istifadə ilə bağlı müraciət edib

O qeyd edib ki, oğlu Rusiyada anadan olub, Rusiya vətəndaşı idi: “Mən də Rusiya vətəndaşıyam. İnanıram ki, qanunlara uyğun, obyektiv istintaq aparılacaq. Azərbaycan tərəfinin bəyanatı, Azərbaycanın Gürcüstandakı səfirinin bizi ziyarət etməsi, Azərbaycan mediasının məsələyə diqqəti məni buna inandırır. İnanıram ki, Vladimir Putinin göstərişi ilə bu işə obyektiv şəkildə baxılacaq. Mən burada doğulmuşam, əlbəttə ki, oğlumu burada dəfn etməli idim. Ona atamın adını qoymuşdum”.

Yaqub Abdullayev bildirib ki, polis oğluna məqsədyönlü şəkildə öldürücü atəş açıb.

Onun sözlərinə görə, hadisə zamanı çəkilən videolar gənclərin müqavimət göstərmədiyini və silah tətbiqinə şərait yaradacaq davranışlara yol vermədiyini sübut edir: “Övladımı heç nədən, boş yerə güllələdi. Rusiyada yolla gedən insanı güllələməyə, tapança ilə başından atmağa icazə verən qanun yoxdur. Müqavimət göstərməyib, lakin polis onun qolunu burur, tapançasını çıxarır, gülləni yükləyir və başından vurur. Əgər qorxutmaq istəyirsənsə ayağından at. Sən axı polis işçisisən. Bu necə olur? Mən hələ ki, hadisənin bütün incəliklərini bilmirəm. Uşağı dəfn elədik, bu gün üçüdür, geri qayıdırıq. Qətli törədən polisi isə buraxıblar. Yəqin ki, elə lazım biliblər, amma hamı çəkilən videodan başa düşür ki, polis məqsədyönlü şəkildə oğlumu qətlə yetirib. Polis işçisi öldürmək istəmirdisə, öldürmək fikri yox idisə, nəyə görə tapançasına gülləni yükləyir? O adam polis işçisidir, birinci növbədə bilməlidir ki, qanunla silah tətbiqi üçün qarşındakı insan sənin həyatına təhlükə törətməli və ya da axtarışda olmalıdır. Əksinə, polis oğlumu təhqir edir, yumruq atır, qolundan tutub burur. Uşağın üzü gülür, polisə tabe olur. Oradakı digər gənclər İlkin İsmayılov və Ruslan Qurbanov da razılaşaraq maşına əyləşirlər. Buna baxmayaraq, polis sanki hansısa terrorçunu, axtarışda olan şəxsi tutubmuş kimi davranır”.

Qeyd edək ki, bu il may ayının 28-də Novosibirsk vilayətinin Moşkovski rayonundakı R-255 “Sibir” magistral yolunun 61-ci km-də “Toyota” markalı avtomobilin sürücüsü yol polisinin “Saxla” tələbinə məhəl qoymayaraq, hərəkətini davam etdirib. Polislər onu təqib etməyə başlayıblar. Avtomobil yol kənarındakı mehmanxananın qarşısında dayanıb. Bir neçə nəfər avtomobildən düşərək qaçmağa çalışıb. Polis həmin şəxslərdən birini tutaraq patrul avtomobilinə aparıb. Bu zaman qaçanlardan ikisi geri qayıdıb və polisə müdaxilə etməyə çalışıb, onlardan biri baş verənləri videoya çəkib, ikincisi – 19 yaşlı azərbaycanlı Vəkil Abdullayev isə yoldaşını polislərin əlindən almağa çalışıb.

Polis V.Abdullaevi bir neçə dəfə vurub, ardınca isə tapançanı çıxararaq ona atəş açıb. Nəticədə V.Abdullaev başından yaralanıb və xəstəxanada keçinib.

Məhkəmə polis əməkdaşının həbsi barədə qərar versə də, Rusiya Federasiyasının İstintaq Komitəsinin rəhbəri Aleksandr Bastrıkinin tələbi ilə polis həbsdən azad edilib.