Azərbaycanda işğaldan azad edilən ərazilərə “Böyük qayıdış”la bağlı tədbirlərə start verilib

Vətən müharibəsində möhtəşəm qələbənin əldə edilməsi və müharibədən sonrakı dövrdə işğaldan azad edilən torpaqlarda  həyata keçirilən layihələr, o cümlədən yeni yolların çəkilişi, Füzuli, Laçın və Zəngilanda  inşa edilməsi nəzərdə tutulan aeroportların tikintisi, Zəngilanın kəndlərində reallaşacaq “Ağıllı kənd” layihəsi, həmçinin bölgənin zəngin  iqlimi,  dağ çaylarının  sularından  istifadə edilməklə bölgənin  dayanıqlı  enerji potensialının yaradılması, dəmir yollarının çəkilişi  barədə  cənab Prezident proqram xarakterli mühüm açıqlamalar  verib.

Bəlli olduğu kimi müharibədən əvvəlki illərdə  ölkəmizin dövlət rəsmiləri  böyük qayıdışla bağlı  xeyli anonslar ediblər. Bədxahlar belə açıqlamaları daim gözdən salmağa çalışırdı.

Prezident  qayıdışla bağlı çıxışlarında  işğaldan azad edilən şəhərlərin baş planlarının hazırlanması üzərində iş aparıldığını qeyd etməklə yanaşı  məlum bölgələrdə irimiqyaslı işlərin görülməsi üçün böyük sərmayələrin yatırılacağını qeyd etmiş, artıq dövlət büdcəsindən  müxtəlif istiqamətlər üzrə nəzərdə tutulan işlərə ilkin olaraq 2 milyard manatdan artıq  vəsaitin yönəldiləcəyini diqqətə çatdırmaqla, bu işlərin başlanğıc  olduğunu  vurğulamışdır.

Ölkənin bütün imkanları səfərbər olunmaqla doğma yurdlarına qayıdacaq məcburi köçkünlərin məşğulluq problemlərinin həll edilməsi, onların normal yaşayış tərzinin təmin  edilməsi sahəsində strateji planları açıqlayan dövlət başçısı eyni zamanda  bu işlərdə  artıq  xarici investorlarla birgə əməkdaşlığa  başlandığını qeyd etmişdir.

Prezident bildirmişdir ki,  qayıdışla  bağlı pilot layihələrin icrasına da başlanıb. Bir layihə – “ağıllı kənd” layihəsi artıq icra olunur. 30 il ərzində öz torpaqlarından qovulmuş insanlar üçün işğaldan azad edilmiş ərazilərdə maksimum əlverişli imkanlar yaradılmalıdır. Onlar layiqli yaşamağa və müasir dünyanın bütün nemətlərindən istifadə etməyə layiqdirlər.

Möhtərəm Prezidentimizin  sərgilədiyi bu proqramların iri maliyyə tutumu tələb etməsi heç kimə sirr deyildir. Müharibədən çıxan bir ölkə üçün bu tədbirlərin qısa müddətdə həll edilməsi  heç də asan məsələ deyildir.

Dünyada hökm sürən  qlobal maliyyə böhranları və son bir ildə isə pandemiya  şəraitinə baxmayaraq möhtərəm Prezidentimizin rəhbərliyi altında  ölkəmizdə həyata keçirilən islahatlar nəticəsində Azərbaycan  iqtisadi potensialına görə bölgədə nümunəvi lider dövlətə çevrilmişdir.

Sosial sferanın inkişafı ilə bütün layihələr  vaxtında icra olunmuş, əhalinin layiqli həyat tərzinin təmin edilməsi məqsədilə maaşlar və pensiyalar daim artırılmaqda davam etmiş, yoxsulluğun səviyyəsi minimum həddə düşmüş, əhalinin pul gəlirlərinin  artımı davamlı prosesə çevrilmişdir.

Ağdaşda  sahibkarlığın inkişafı, aqrar sektorda  aparılan işlərə dəstəyin davamlı olması, yol infrastrukturunun yenilənməsi, aztəminatlı ailələrin mənzil şəraitinin yaxşılaşdırılması məqsədilə yeni yaşayış və fərdi evlərin tikilməsi, həmçinin məktəbəqədər  və ümumtəhsil məktəblərinin maddi-texniki bazasının möhkəmləndirilməsi məqsədilə tədbirlərin intensiv xarakter alması yuxarıda qeyd edilənlərin əyani sübutudur.

Bu gün rayonda   əhalinin güzəranının yaxşılaşdırılması istiqamətində  mühüm tədbirlər həyata keçirilir. Rayon sakinləri möhtərəm Prezidentimizin daxili və xarici siyasət kursunu bəyənir, onun ətrafında  daim həmrəylik nümayiş etdirir, dövlətimizin uğurlarından böyük qürur duyurlar.